詹天文麥花臣開騷告別細路女 「媽媽」樂易玲激讚前途無可限量. 歌手詹天文（Windy）今日（6日）現身尖沙咀，出席《Windy詹天文 CHAPTER ONE LIVE IN HONG KONG》記者會，宣布將於7月11日假麥花臣場館舉行首個個人演唱會。Windy以牛仔裙襯皮靴亮相，引來大批「天文台」（粉絲暱稱）歡呼。佢透露，知道可以開騷一刻正在上堂，心情又開心又感動又百感交集，多謝公司、家人同所有粉絲嘅支持。

Windy話演唱會命名為「CHAPTER ONE」，對佢別具意義：「上年我推出咗一首歌叫《序章．結局》，每個人嘅人生都有一個序章，我呢幾年裝備緊自己，就係Chapter one去開屬於個人嘅演唱會。」佢希望呈現自己不同階段嘅成長與蛻變，讓歌迷感受到真誠同熱情。Windy透露已進入密集排練，想擺脫細路女感覺，舞蹈會由Jazz變成Hip Hop，有小小型格，仲預告有驚喜環節。

記者會上，聯合贊助商送贈光學眼鏡一副，寓意全新視野；粉絲代表送上紫紅色鮮花同燉湯，為佢打氣補身。電視廣播有限公司助理總經理樂易玲上台致辭，大讚Windy乖到不得了，第一次見佢14歲，而家高咗又愈嚟愈靚，好勤力讀書又叻，每一樣嘢都超額完成。樂小姐話月頭喺天河體育館嘅大型活動，Windy一開聲驚為天人，歌聲比預期仲好，前途無可限量，𠵱家先20歲，有康莊大道喺前面。Windy感動回應「我愛你樂小姐」，樂小姐亦話「我都愛你」，仲預告每年都會同佢開騷，引來粉絲尖叫。

Windy接受訪問時坦言心情緊張又興奮，每日早兩個鐘起身健身，希望有肌肉線條，仲笑言朝早用力縮嗰陣有少少馬甲線，希望到時自然流露。演唱會嘉賓方面，佢大賣關子，話唔只一個，係「好神秘嘅嘉賓」。對於樂小姐嘅愛護，Windy話樂小姐真係好似一個媽媽，成日教佢好多嘢，叫佢努力。佢理解樂小姐嘅預告係每一年都要再進步，呢個只係Chapter 1，希望之後有更多Chapter。TVB