楊明莊思明8.2吉隆坡結婚 風雨同路十年終修成正果.39歲莊思明（Lisa）與楊明拍拖10年，經歷過唔少風風雨雨，莊思明對楊明一直不離不棄，更曾公開話非楊明不嫁。今日（5日）終於傳出好消息，《星島頭條》收到獨家消息，兩人定於8月2日（星期日）喺馬來西亞吉隆坡JW萬豪酒店舉行豪華婚禮，一對準新人嘅喜帖亦首度曝光。

喜帖上，楊明深情攬實未婚妻纖腰，深情凝望，眼神充滿無限寵愛；莊思明就披上嫁衣甜笑滿瀉。不過網民嘅焦點都落喺準新郎楊明身上——喺愛情滋潤下，楊明驚現「幸福肥」，面龐圓潤飽滿，身形暴脹，同平日銀幕上嘅俊朗形象好大分別，幾乎令人認唔出！據悉，一對新人為咗保密婚訊，不惜借愛犬過橋，掩人耳目。

莊思明同楊明拍拖10年，期間屢次被催婚。今年3月，楊明出席《愛回家》宣傳活動時，曾話年紀漸長，想為婚事準備驚喜，雖然長輩們開明，叫佢哋旅行結婚就可以，但佢想搞盛大婚禮，分別喺香港同馬來西亞兩地舉行，需要啲時間準備，但預告「今年好大機會」。原來兩人早於4月已經低調籌備，偕愛犬喺影樓拍攝婚紗照，當時以「星級人寵時尚雜誌」包裝，成功轉移視線。

隨住吉日逼近，楊明同莊思明近日陸續向親友發出請帖，婚訊終於曝光。婚禮定於8月2日喺吉隆坡JW萬豪酒店Mayang Sari大宴會廳舉行。喜帖以深色為基調，配搭閃爍金色光點，營造夜晚星空嘅夢幻感；新人身著華麗禮服，姿態親密，名「Lisa & Mat」以金色霓虹燈效果呈現，設計精緻，充滿高級感。

今年4月1日係莊思明同楊明拍拖10周年，當日兩人曾喺IG貼出一輯「婚照」並留言：「Happy 10th Anniversary to us！不經不覺就十年啦，感謝你一直都咁愛錫我遷就我同包容我，呢十年間我哋兩個經歷過高山低谷，當中有歡笑亦有眼淚，感恩無論發生咩事我哋仍然有對方係身邊！我同你都唔係會講肉麻情話嘅人，一切在心中啦。」當時已經惹嚟結婚疑雲，不過二人其後再轉發帖文聲稱係「星級人寵時尚攝影」，原來係早有準備。

莊思明曾話唔太心急結婚，因為同居同結婚無乜分別，起居飲食都係楊明照顧佢，楊明好捨得使錢喺佢身上。不過莊思明鍾意儀式感，楊明話如果唔求婚，驚佢第時老咗會怨佢。如今終於修成正果，恭喜晒！TVB杨明庄思明