姚焯菲聞《愛回家》大結局眼濕濕 澄清同Ryan只係好閨密.「國民初戀」姚焯菲（Chantel）趁住美國學校假期返港，馬不停蹄出席唔同活動。佢日前接受《香港01》訪問時，提到處境劇《愛·回家之開心速遞》即將迎來大結局，至今仍未收到劇組通知叫佢回去客串，但佢心底裡其實好渴望可以同大家「大團圓」。Chantel話：「其實我都好想入去，再真係團一團聚先。同埋我有啲唔開心嘅就係，自己好似係一份子，突然之間個屋企唔見咗咁，所以好想返去團聚。」佢仲透露本來想搵監製傾，可惜對方唔喺度。

講到之前見過《愛回家》嘅拍檔，Chantel話見咗「二表姨」同「公公」等人，雖然只係寒暄咗幾句，但已經百感交集：「我哋都冇多講好多說話，就係好唔捨得咁攬住，大家都明白個心情係有啲複雜，覺得有緣但又好開心可以見返大家。」佢承認嗰一下大家全部眼濕濕。

講到美國留學生活，Chantel笑言好開心，每個星期都有唔同活動，例如去新舖頭或者參加狗狗聚會。佢話美國嘅生活空間比香港自由好多：「我覺得個空氣好好多，呢個已經係相差好大。喺嗰邊我可以成日出去行街，著件外套就出得，喺香港完全做唔到。我喺嗰邊可能行20、30分鐘都冇問題，但喺香港大家都知咩事啦。」至於有冇變得「鬼妹仔」多去Party或者打扮性感，Chantel即刻耍手擰頭，話自己好少出夜街，因為危險，亦都帶返香港啲衫過去著，冇特別變得性感。

對於同李克勤兒子Ryan嘅緋聞，Chantel大方澄清，話兩人只係「好閨密」：「我同Ryan其實係好好嘅朋友嚟嘅！我好開心可以認識到佢。第一次去美國嘅時候，一個香港人都冇，咩香港人都唔識，佢係我第一個香港嘅朋友。」佢仲笑住爆料，話兩人係透過一個共同嘅老師介紹識，因為大家都係用同一個老師。Chantel強調，Ryan係一個可以傾訴心事嘅好知己。TVB