余宗遙笑稱嬲丁子朗「拋棄」佢哋 黃星綽話家姐睇完MV想報警. 由《亞洲超星團》出身嘅冼靖峰（Archie）、余宗遙（DEZ）、文佐匡（Sean）、黃奕斌（大Hugo）同黃星綽（細Hugo）組成全新限定男團「SURFIVR」。五子昨日（3日）齊齊現身公益金記者會活動接受《香港01》訪問，大談新歌籌備點滴，更爆出新歌MV好多「內幕」，涉及同女主角Anissa嘅互動，仲有「大、細Hugo」嘅感情戲。

余宗遙透露「SURFIVR」本來有6個人，但係因為丁子朗太忙：「佢就好忙啦，又要拍劇啦，又準備搞畫展啦，拋棄咗我哋。有時見到佢，都仲有少少嬲嘅！」雖然丁子朗未能一齊組男團，但黃星綽希望可以有「crossover」：「畢竟我哋嗰陣超星團節目，一班兄弟識落之後好似爭咁啲，冇咗佢爭啲嘢咁。所以我哋都好掛住佢，都好希望有一日有啲表演可以cross over，一齊玩下。」

對於MV女主角Anissa係黃星綽姐姐小倬嘅隊友，問到係咪由黃星綽牽線，佢話：「其實今次我會話完全唔關我事㗎！」黃星綽更透露新歌MV裡面有好多火辣情節，不過最後好可惜被導演剪走咗。至於姐姐睇完之後嘅感覺，黃星綽笑指：「家姐睇完之後想報警啊！睇完之後想報《東張》！佢好唔慣見到我有啲感情戲嘅展示啦，佢見到之後直頭想嘔啊！」

被問到五子同MV女主角Anissa有冇「過電」，黃星綽率先話：「鏡頭面前係專業㗎嘛，咁就算內心嘅感受係點樣，最緊要就係個畫面呈現係點樣。」余宗遙反問「即係有冇過電啊？」黃星綽先回答：「其實係絕緣體嚟嘅！咁就過唔到電啦。」佢話因為「家姐睇住」，所以鏡頭面前要交足戲。黃奕斌亦否認：「我遇到籃球呢啲事，我就得返認真。淨係同打波有關，好似變咗『隻揪』咁樣，都係絕緣嘅。」余宗遙搞笑話：「講明先，我架車冇絕緣嘅，我嗰㗎唔係電車所以過唔到電。」文佐匡話同Anissa有傾打機，但佢哋係最後一班拍MV：「大家都好攰㗎啦，We just wanna finish。」同樣過唔到電。冼靖峰就單刀直入話「冇過電」，因為「我仲要係彈緊鋼琴嘅時候，仲諗緊啲chord。」

五子中數位係籃球愛好者，被問到有冇遇過好似翁金驊咁嚴厲嘅教練，佢哋話：「我哋打街波就冇跟教練，我哋都好少打聯賽，打得最多嘅就係TVB無綫盃。氛圍比較業餘，玩為主，have fun為主。」限定組合SURFIVR雖然各團員發展賽道唔同，但今次新歌MV拍攝展現出前所未有嘅凝聚力。最後五子呼籲大家多多點擊支持新MV，若點擊率理想，不排除推出完整Dance Version回饋粉絲。

TVB