關嘉敏廖慧儀「熒幕初吻」獻給同一人 大讚丁子朗有禮貌冇伸脷. 關嘉敏同廖慧儀昨日（3日）出席公益金記者會活動，接受《香港01》訪問時透露非常期待新女團嘅出道表演。講起工作近況，原來兩人有一個超級巧合嘅共通點——佢哋嘅「熒幕初吻」同第一次拍親熱戲，對手竟然都係同一個男藝人：丁子朗！兩位靚女講起時都忍唔住大笑話：「丁子朗，佢有冇搞錯啊，佢就正啦！」

關嘉敏同廖慧儀受訪時笑指唔知道對方同丁子朗曾有親熱戲，直到今次訪問先發現呢個「秘密」。雖然第一次拍親熱戲難免緊張，但二人都大讚丁子朗表現專業又有禮貌。廖慧儀憶述當時拍攝情況，話丁子朗事前會同佢brief清楚：「丁子朗做對手呢，其實佢都好好禮貌嘅，即係佢會brief下我，一陣間點樣點樣啊。」直指丁子朗係「經驗擔當」，當然佢都補充話「丁子朗冇伸脷」。

關嘉敏亦表示認同，話「丁子朗係一個好好嘅親熱對手」。佢指丁子朗事前會主動同對手溝通好所有細節，預先講清楚自己做咩動作：「佢會首先顧咗你嘅感受先，即係佢會覺得如果我咁樣你會唔會舒服啲，或者如果我點樣做可以點樣配合你，佢係講得好清楚。同埋佢會知道邊一步邊一步我會咁樣啦，佢係真係講到明晒，然之後親熱戲拍完佢會問我，點啊你？有冇hard feeling？你ok嗎？」佢哋表示呢種做法令作為新人嘅兩人都感到非常安心，絕對唔會有被冒犯嘅感覺。TVB

至於最近另一個熱話——喺片場有冇曾被「教戲」，兩人異口同聲話冇，雖然都有俾前輩「教戲」，但都係善意嘅指導：「暫時未去到有欺凌嘅狀況。」