梁嘉琪爆《金枝慾孽貳》片場遭年輕姐仔欺負 伍詠薇仗義護花. 梁嘉琪同簡慕華近日一齊亮相HOY TV節目《九運會客室》，大談圈中往事，更爆料拍劇秘聞。繼簡慕華早前自揭拍旅遊節目時曾被「鹹豬手」騷擾後，梁嘉琪亦回憶起當年拍攝《金枝慾孽貳》時嘅一段難忘經歷。嘉琪透露，當時佢資歷尚淺，喺劇組面對一位名氣較高、但年紀比佢哋細嘅女星，感到壓力好大。佢形容對方經常「指點」眾人，甚至帶點命令口吻，氣勢十足。主持人伍詠薇亦補充，該女星喺唔同人面前態度各異——對梁嘉琪係一副面孔，對主角又係另一副面孔，私下更愛「藐嘴藐舌」，令人感覺雙面。

梁嘉琪更爆料，當年劇組食飯時嘅座位安排，對方也會插手：「可能唔想我哋同導演、主角一齊坐」。身為主角之一嘅伍詠薇見狀即時出手，主動將梁嘉琪拉到自己身邊，豪氣話：「嘉琪，跟住我，坐我隔籬！」更關心追問：「點解成日俾佢蝦㗎？」直言會為佢撐腰：「我會保護你，你跟我尾。」呢份暖心舉動令梁嘉琪同簡慕華非常感動，因此建立起深厚友誼。

節目播出後，網民即化身偵探，根據「年紀較輕、當時已有知名度」等線索推測涉事女星身份，包括葉翠翠、苟芸慧、龔嘉欣等被點名討論。其中，如今已成為視后嘅龔嘉欣更被部分網民視為最大嫌疑，原因係當年佢正值無綫力捧期，知名度高又年紀較輕，條件與梁嘉琪所形容嘅情況相若。不過一切仍屬網民推測，真相依然撲朔迷離。TVB