丁子朗坦言拍吻戲唔享受辛苦過拍打戲 慶幸從未遇過欺凌事件. 丁子朗昨日（29日）出席TVB節目巡禮活動後接受《香港01》訪問，大談拍攝親熱戲嘅經驗。佢入行以來參與過唔少親熱鏡頭，包括喺《青春不要臉》中同戴祖儀嘅多場激烈吻戲。對於拍吻戲，丁子朗直言其實唔係大家想像中咁享受：「除非嗰個真係堅嘅，如果唔係嘅話九成都唔係enjoy嘅，所以都好想快啲拍完就完。因為親熱戲比打戲仲難，打戲拳拳到肉就好睇，但親熱戲嗰個感覺，有時導演都未必捉得好，演員都未必捉得好，拍完唔啱mood，錫咗但點解冇火花呢？所以要大家配合，拍親熱戲好難好辛苦。」

丁子朗強調「溝通」與「信任」係拍吻戲嘅關鍵，佢會主動同對手女星討論細節：「最緊要係同對方溝通得清楚，對方知道有個信任喺度，知道我哋嘅界限做啲乜嘢係ok，做啲乜嘢唔ok。因為我都怕有時女仔尷尬，我會主動去講，陣間大約鏡頭喺呢度，我會點做，做到呢個位就唔做㗎喇，你覺得ok唔ok？」佢笑言同戴祖儀因為本身係好友，所以默契十足。講到最難忘嘅經歷，佢提到一次喺內地拍戲，只係蜻蜓點水錫額頭，但因為同對手唔熟，最後要靠導演用燈光同夢幻氛圍補救。

被問到圈中係咪存在欺凌事件，丁子朗表示自己好幸運，多年來未曾遇過：「即係而家社交媒體咁發達，大家都唔會去做啲特別過份嘅嘢，如果係可能會畀人擺上網。（有冇聽過其他人有欺凌事件？）即係我認知或者我眼見啦都冇囉。」