林夏薇新劇《玫瑰戰爭》同楊茜堯鬥生鬥死 老公破產期無限延長：冇補充

視后林夏薇今日（29日）現身灣仔出席無綫（TVB）節目巡禮，接受《香港01》訪問時透露有份參演新劇《玫瑰戰爭》。《玫瑰戰爭》係佢再次同楊茜堯合作，林夏薇話好期待，因為今次角色好有發揮同挑戰性，可以睇吓大家喺劇入面點樣再鬥生鬥死。佢透露最多對手戲嘅係楊茜堯同陳豪，仲話今次係第一次真係同陳豪喺劇入面合作，仲有姚子羚，如果有睇預告片都知道大家都幾剛烈。劇中佢冇感情線，故事圍繞娛樂圈明爭暗鬥。林夏薇仲話好開心可以參與片尾曲，之前都有唱過主題曲同插曲，好享受唱尾曲，因為好多拍攝畫面會浮現出嚟，更加有感覺。之前佢喺《大生意人》飾演慈禧，今次《玫瑰戰爭》係唔同劇種，希望讓觀眾睇到唔同面向嘅魅力。

另外，林夏薇丈夫莫贊生（Jason）早前捲入巨額債務風波，近日有新進展，有指莫贊生因未遵從相關條款提交完整財產與財務資料，破產受託人喺破產管理署不反對下，向法庭申請「破產不開始令」並獲批准，意味原本為期4年嘅破產期將被無限期凍結，直至佢正式提交齊全財產資料為止。林夏薇被問到有冇陪老公散心或者煮餐好餸為佢開解，佢保持微笑話：「都冇乜特別，件事都過咗啦。」再追問進展時，佢話：「之前講咗已經交畀律師處理，都冇乜特別補充。（已搬離山頂豪宅？）冇嘢回應，多謝晒！」TVB