愛回家｜葉蒨文傳被陳浚霆「打毒針」踢出劇組：假如真我點知啫. 近年無綫處境劇《愛·回家之開心速遞》不時傳出人事變動，近日網上更有驚人爆料，暗指劇中飾演「風少」嘅陳浚霆涉嫌喺背後「打毒針」傷害同劇演員。爆料點名指出，飾演「Candy」嘅葉蒨文（Sophie）同曾展望（Donovan），就係因為慘遭「打毒針」而雙雙被踢出劇組，引起網民熱烈討論。

今日（29日）葉蒨文出席無綫電視節目巡禮，接受《香港01》訪問時笑言：「我唔知喺第幾集，就去咗哈爾濱結婚，未返過嚟。不過都希望，之後如果有一個大結局，可以同觀眾見面。」至於網上盛傳陳浚霆「打毒針」嘅傳聞，葉蒨文直言自己都係聽到記者提起先知，仲幽默反問係邊個編造出咁戲劇性嘅故事：「網上面啲人係點樣講㗎？係咩？等我上網睇吓先！不過如果……假如真係有人打毒針，我哋點會知啫。」

被問到私下同陳浚霆嘅關係，以及係咪相信對方係呢種人，葉蒨文表現得非常豁達，認為唔需要過於深究網上傳言，最緊要係活在當下：「我又覺得唔使點樣去睇，因為有啲嘢其實你想去考究點解走、或者點樣，冇意思㗎，你根本唔會知道一個答案。我自己就覺得，我依家過得開心唔開心？都幾開心吖！我就相信公司畀我嘅安排就係最好嘅安排，跟住去囉。人係冇辦法控制所有嘢嘅，但係我哋面對到任何事情嘅時候，就可以自己去決定用咩心態，同埋點樣喺嗰度再創造機遇同機會。」佢亦透露，以往喺劇組中同陳浚霆嘅合作機會其實唔算多，通常都係一大班人一齊拍，所以對對方嘅為人「唔算太了解」。最後，講到今次嘅「毒針風波」，葉蒨文笑稱覺得呢個傳聞非常新穎：「我都覺得意外嘅，因為好似之前都冇聽過有呢啲嘅新聞炒出嚟。我會覺得呢個題材好新穎囉！」TVB