前港姐冠軍馮盈盈早前搏到盡拍攝內衣廣告，身材再「發育」的她，昨日在港姐招募記者會上力撼「峰」騷小師妹陳詠詩，上演同門「胸」戰！現場資歷最深的盈盈相當感慨，坦言：「人生有幾多個10年。」

新一屆《2026香港小姐競選》正式展開招募，應屆港姐冠軍陳詠詩與一眾師姐馮盈盈、陳曉華、宋宛穎、倪樂琳、莊子璇、陳楨怡、梁凱晴、梁超怡及王菲等，昨日在將軍澳電視城出席記者會。2016年港姐冠軍馮盈盈相隔10年已榮升大師姐，早前獲垂青拍攝內衣廣告的她上圍再度升Cup，以Deep V長裙性感亮相，力撼近年港姐最有睇頭、身穿白色低胸裙「Big」爆現身的陳詠詩，「胸」戰一觸即發！至於向來不Sell身材的陳曉華及莊子璇，則分別以露肩裝和Tube Dress示人，齊晒香肩，同樣吸睛。

今屆港姐招募以「敢．至完美」為主題，講到人生做過最勇敢的事，盈盈直言是參選港姐，她感慨說：「人生有幾多個10年，自己最勇敢嘅事就係報名參加香港小姐，面試要見傳媒，又要着泳衣見評判，呢啲體驗都令自己有勇氣面對挑戰。」她還補充道：「唔經唔覺，我已經係全場資歷最深嗰個師姐，人生有幾多個10年，時間真係過得好快，面試都好似係尋日發生咁。」近年轉型的她透露有待公司安排新工作，直言AI無疑對演藝行業產生衝擊，揚言將來或許會以「AI盈盈」現身，並否認之前將約滿無綫的傳聞，指合約還有一段時間，一直有與公司洽談續約事宜，又稱對公司的工作安排感滿意。

談到早前拍攝內衣廣告，身材較10年前選美時更豐滿，盈盈笑說：「呢個唔係AI盈盈，係真人嚟，希望廣告可以接踵而來，展現女性健康美。」對於廣告底線，她認為只要健康有活力就沒有問題，因為選港姐時也試過以三點式示人，展現女性美態。

身旁的陳曉華亦坦言不介意拍攝內衣廣告：「最緊要係自己Keep到Fit先，咁先有機會拍，依家每個星期會打3日泰拳，希望練出肌肉。」近年劇接劇的她入行8年，累計演過18個角色，問到下個目標是否衝擊視后？她指有很多角色還未嘗試，之後會在新劇《璀璨之城》和《夫妻的博弈》呈現不同面貌。問到二人可有人選可推薦參選？盈盈笑言要從朋友的女兒入手，又指與宋宛穎、莊子璇皆是港大出身，大可從校園招募着手，中大畢業的陳曉華則笑指母校美女不輸港大。

莊子璇搵師妹上陣

即將卸任的陳詠詩坦言有點不捨，希望日後能嘗試拍劇及司儀工作：「自己性格有少少拘謹，可能以前係體操運動員，慣咗任何時候都係表演咁，好難百分百做自己。」講到現在劇集製作不多，可擔心拍劇機會買少見少？她說：「自己都係抱住嘗試嘅心態，睇吓有咩機會。」提到妹妹獲網民激讚靚女，可會提名對方參選？她說：「細妹依家喺瑞士讀緊碩士，如果將來佢有興趣都會支持。」

而莊子璇自嘲過去邀請朋友參選從未成功，連遞交報名表這個階段也失敗，因朋友擔心承受輿論壓力以及要以泳裝示人，她笑說：「喺港大都有啲心水嘅師妹，睇吓佢哋有冇興趣，有興趣可以做佢哋提名人，先斬後奏幫佢哋報咗名先。」

此外，無綫助理總經理樂易玲表示港姐招募剛開始，會視乎報名人數再考慮海外招募事宜，希望可踏出香港。製作部助理總監姜偉指稍後會公布賽制，正計劃到外地取景，希望透過旅程讓佳麗互相認識，讓觀眾留下深刻印象。

2021年港姐冠軍宋宛穎昨日談到人生中最勇敢的事時，表示除了參選港姐，就是參加《魔音女團》，坦言曾有不少人問她「洗甩港姐味未」，希望透過節目展現港姐另一面，還笑言雖然唱功麻麻，但希望以舞技搭夠。

至於2022年港姐季軍梁超怡入行後有不少拍劇機會，更扮演過優秀前輩的年輕版角色，直言會因擔心表現欠佳而壓力很大。而2019年港姐亞軍王菲直言參選是自己最勇敢的時刻：「以前自己比較粗魯，仲要人生第一次着高踭鞋，行到好似隻鹿咁！」她回憶當年才藝表演，身邊朋友都認為應展現港姐斯文高貴的形象，她卻堅持跳街舞展現真實一面，結果成功贏得不少分數。