《試真D》江美儀被觸及家人底線 反擊網民：純粹發洩冇建設性

視后江美儀近日因為參與無綫飲食節目《試真D》而成為全城熱話，但高人氣同時帶嚟排山倒海嘅網民評論。今日（21號）江美儀聯同節目主持現身宣傳活動，面對網民嘅「負評」同「質疑」，佢冇迴避之餘，仲以一貫真性情逐一反擊，更預告下集將有「生命危險」嘅挑戰！

自節目開播以嚟，唔少網民批評江美儀評論過於尖銳，甚至有人質疑節目「做假」。江美儀接受訪問時大方回應，話當初開節目前專登問過製作團隊：「我真係喺開節目之前去問佢哋，你想我就住講定唔係？佢哋話老闆話你要用真性情、要照講，我話得唔得㗎？佢哋話得，又氹我，咁咪照講囉。」佢強調自己係「對事不對人」，並非刻意刁難餐廳：「我係分析件事，有讚有彈，唔係一味靠踩。而家觀眾鍾意睇貼地、真實嘅嘢，我係自己俾錢去試，我有權批評。」

對於有網民投訴節目長度唔夠，江美儀將呢樣視為另類讚賞：「網民話節目太短，其實係好事，代表佢哋覺得好睇、睇得好快。」佢話如果節目反應持續熱烈，絕對會考慮加開第二季，並會根據網民建議增加長度同走訪更多餐廳。

不過，江美儀對部分偏激言論表明有底線：「你點批評我冇所謂，但涉及到我屋企人，我就唔得。呢件事唔關我屋企人事，而佢嗰個評語亦都唔係對節目或者對我有咩幫助，純粹係一個發洩。如果有個純粹嘅發洩涉及到我屋企人，我就會出聲。」佢仲預告下集內容將會「更激、更危險」，開玩笑話甚至可能對「生命有危險」，形容震撼程度遠超之前嘅海鮮店挑戰。