女神配對計劃2｜34歲阮嘉敏自爆被4個同事暗戀 拒食軟飯男：要有上進心.年初憑內地微短劇《瘦一斤，賺一斤，虐哭前任不過癮》人氣急升嘅阮嘉敏（Mandy），昨日（16號）現身電視城出席《女神配對計劃2》全球招親記者會，正式加入「女神」陣容。佢接受訪問時透露，原本四月要返內地拍短劇，因為延期所以趁空檔參加真人騷：「係公司提議我參加嘅。上星期尾突然叫我返嚟面試，結果一傾就傾咗兩個鐘，回顧返咁多年嘅戀愛心路歷程，呢幾日啲前度不斷喺腦入面浮現，有啲個樣甚至已經好模糊。」

現年35歲嘅阮嘉敏係5位新女神中年紀最大，今次亦係佢入行10年第一次參加真人騷，直言心情好緊張：「屋企人好鼓勵我參加。（係咪因為妳35歲，擔心妳？）係嘅，但我覺得呢個年紀都係優勢，因為我年紀最大，大家會幫我先。」

講到感情經歷，拍過四次拖嘅阮嘉敏透露有一任男友涉及「無縫接軌」令佢受傷。當時兩人冷戰約兩星期，當佢嘗試挽回時，對方態度180度轉變：「我問佢係咪同咗第二個女仔一齊，佢話冇，但最後我哋分開咗，佢哋就真係喺埋一齊。」不過佢認為愛情無分對錯，一齊三年對方也曾呵護備至，所以唔緊要，最緊要對方開心。

阮嘉敏亦自我檢討，承認過往太專注工作而冷落另一半。因為藝人工作時間唔穩定，佢多次為拍劇或出活動而放飛機，連對方生日都只陪到半日：「我將份工作擺喺第一位，令佢哋好委屈，係唔好嘅，未來要好好檢視，學識平衡。」問到怕唔怕被前度爆黑歷史，佢話唔擔心，因為分手後唔再聯絡，但會互相祝福：「佢哋知道我參加呢個節目，可能會話『死啦，佢仲未嫁到』，然後祝福我搵到好男人。」

對於擇偶標準，阮嘉敏坦言唔太接受姐弟戀：「男仔比較遲熟，再搵個細過我嘅，我未必駕馭到，驚要湊仔，唔想擔心老公食咗飯未、識唔識包紮傷口。」年齡上限就可以大十幾甚至廿年，最緊要夾。活動上佢自爆兩個月前想去相睇，因為自己好「宅」，平時唔係公司就係屋企：「阿媽問我點解聖誕節都喺度，我話冇人約。我想拍拖㗎。既然相睇要俾錢，而家公司有騷錢俾我，仲幫我搵男朋友，所以唔好再話公司唔俾拍拖了。」TVB