張馳豪「滄桑男」造型亮相 自爆新Look未習慣：連遮瑕膏都唔使搽.歌手張馳豪日前以一身深綠色西裝現身內地音樂活動，一改以往清爽陽光形象，以「滄桑男」造型亮相。佢接受訪問時坦言，呢套造型其實係為咗六月中完工嘅新劇《警是个大佬》角色而設，雖然對新Look未完全習慣，但就大讚新造型幫佢慳返唔少化妝時間。

對於首次以鬚根Look出席大型演出，張馳豪顯得興奮又帶點唔習慣：「有時一醒望住自己個樣，會諗：我咁樣出去唱歌會唔會嚇親人呢？今日係第一次呢個Look做大型演出，睇下大家接唔接受到。」粉絲反應相當兩極，有人話「幾OK喎，Man喎」，亦有粉絲覺得唔習慣。講到會唔會長期Keep呢個造型，佢笑言：「老實講方便好多，連遮瑕膏都唔使搽，化妝可以快5至10分鐘，但要睇下之後表現點啦。」

張馳豪透露新歌已進入製作階段，預計暑假同大家見面。佢大方預告新歌將會係一首快歌，風格比以往更加大膽：「歌名同主題都幾吸引，會比較Sexy啲、性感啲，關於男女關係嘅主題。」

除咗拍劇同籌備新歌，張馳豪近期亦積極投入體能訓練，準備參加五月初舉行嘅「Hyrox」體能挑戰賽。佢話目前狀態係「跟時間賽跑」，因為要應付高強度體能：「首先你要跑好多，總共跑成8公里，我平時又冇跑開步，需要時間去練，盡力練緊。」今次佢會同隊友孔德賢一齊參加雙人賽，拍劇空檔都會爭取時間操練，希望到時以最佳狀態完成賽事。TVB