朱千雪接廣告商演暫不拍劇 感激吳啟華羅子溢當年提點.朱千雪（Tracy）今日以大使身份出席「香港乳癌基金會」嘅「嶄新乳癌影像診斷設備 暨乳癌篩查資助計劃」啟動禮。自從成為人母之後，Tracy覺得自己責任好大，要兼顧家庭、囝囝同工作，唔想因為病倒而要停工，或者要家人反過嚟照顧自己。佢坦言：「未生小朋友之前真係感受唔到呢份責任嘅重量，所以生完之後即刻做咗全身檢查，之後每隔兩年都會再做相關檢查。」

Tracy開心透露公司不停為佢接廣告同商業活動，但拍劇因為要花太多時間，所以暫時未有考慮。被問到早前受訪時提及吳啟華同羅子溢兩位前輩幫咗佢好多，佢解釋：「當年完成港姐選美後幾個月，未卸任就開始拍第一部劇，我冇讀過演藝訓練班。最初監製想角色有層次，但我當時得23歲，對人生仲未有深度，唔識拿捏角色同對白，兩位前輩幫咗我好多。」佢續說：「以前叫我笑就笑、喊就喊，根本唔知點解；而家38歲，當然知道有更多層次。」

對於早前接受鄧佩儀網台節目訪問時全程用流利英語對答，被網民質疑兩人同為中國人但用英語交談，Tracy解釋該訪問係舊年11月妹妹喺加拿大結婚時所做，大家冇留意到訪問地點係加拿大，連攝影師都係外籍人士，所以同講中文與否無關。

有網民翻出Tracy學生照，讚佢細個已經貌美清純，可以當校花。Tracy對此感到開心，但話細個喺外國讀書，當地冇校花選舉，仲笑言：「就算有都唔敢參選，因為我怕醜呢！」被問到細個樣貌帶點混血兒感覺，佢話：「細個我皮膚較黑，曾經喺街上被人問我爸爸係咪外籍人士，所以我一直唔敢曬太陽，因為曬黑咗好難變白。」TVB