《正義女神》周嘉洛被封「顏值擔當」人氣急升 戴祖儀笑言感情線交公司.周嘉洛、戴祖儀今日（19號）到鑽石山出席劇集《正義女神》宣傳活動。周嘉洛喺劇中被封「顏值擔當」後人氣急升，現場歡呼聲僅次於視后佘詩曼，認真犀利。兩人受訪時透露，今次係佢哋第二度合作，因為有蔣祖曼同馬貫東一齊組成四人組行動，所以多咗機會傾偈交流。

講到周嘉洛越來越吸睛，戴祖儀笑言係「有目共睹」，但自己就唔敢亂「睹」。問到羨唔羨慕佢身材勁，戴祖儀話台慶嗰陣已經見過周嘉洛真空上陣，亦欣賞佢夠勤力。至於一齊做運動邊個最嘈？戴祖儀話個個都嘈，周嘉洛就笑指係蔣祖曼，因為佢柔軟度唔夠。周嘉洛仲話自己做運動做到上癮，每日最少做一個鐘。戴祖儀就話周嘉洛的確好大隻，但自己因為工作忙加上做運動都瘦咗唔少，所以企喺佢身邊都有自信，只係間中難免會水腫。

講到《女神配對計劃2》日前正式公布，戴祖儀再度「落榜」？佢解釋因為工作多，好多監製都問過佢檔期，但工作安排始終交畀經理人處理。至於節目設有「隱藏女神」環節，戴祖儀坦言完全唔知情，仲話要做「隱藏女神」介入好有難度，既要好靚又要好主動。佢笑言唔知幾時先有機會參與，仲話自己嘅感情線都交畀公司安排。周嘉洛聽完都忍唔住笑，話感情都交畀公司一定係好員工，又認同「隱藏女神」係一個好有挑戰性嘅安排。TVB