「獅子王」羅天宇無緣20強 真情剖白告別《中年好聲音4》：唔捨得個舞台.《中年好聲音4》尋晚（19號）播出嘅「團隊搶分戰」下半場，尤淑情隊最終淘汰咗兩名學員——羅天宇同楊嘉瓏，比賽正式落幕。20強完整名單亦隨之出爐，包括范子睿、許雲妮、莫家淦、鄭家聲、馬浩宜、鄭仲豪、科亞高巴、許美琪、黎若雪、周志康、尤淑情、卓猷燕、姚兵、雷小雷、吳亦偉、蔡宓婕、尹景順、可嵐、戴藝以及陳旭培。

有「獅子王」之稱嘅羅天宇，今日（20號）喺社交平台上載自拍短片，感性發文正式告別《中年好聲音4》。佢喺片中透露好唔捨得個舞台：「第二就係覺得自己冇留低一首滿意嘅作品，就算今日攞到87分，我都覺得喺唱方面可以有好大嘅調整。」佢仲話好唔捨得一班參賽者，因為大家互相幫助，感情好好。

雖然無緣晉級，但天宇話呢趟收穫滿滿，感激每一個留言：「好可惜冇得繼續喺呢個舞台上唱歌畀大家聽，係我唔爭氣……不過我會繼續努力！希望將來有更多機會再喺台上感動大家。」佢特別多謝《中年好聲音》嘅台前幕後，最後以「再見獅子王」作結。帖文一出，獲周志康、谷婭溦、鄭衍峰等人力撐，大批網民亦湧入留言區打氣：「加油天宇！」、「日後一定會有自己嘅代表作！」

TVB