金像獎︱廖子妤爭影后緊張到肚屙 有信心攞最佳衣着.有份角逐影后嘅廖子妤，著住一身銀色閃片晚裝亮相，閃片仲隨住佢行路不斷跌落地下。佢受訪時透露因為緊張而有少少肚屙，話以為肚屙完會令小腹收細，可惜仲喺度。不過佢笑言一陣入場會收返小腹。問到點解小腹脹起，佢就話可能因為飲咗水，但今日最緊要發光發亮，呈現好氣色。講到角逐影后嘅信心，佢直言有信心，仲笑話如果冇信心就靠件衫，因為件衫包到佢肋骨好緊，包到好有信心。至於最佳衣着獎，佢都話有信心，仲揚言如果有機會競爭，歡迎大家投佢一票。