金像獎2026｜75歲元華與伍允龍任頒獎嘉賓 「朱凌凌」激罕合體.第44屆香港電影金像獎今日（19日）喺香港文化中心舉行，同往年一樣，一眾演員先以最靚姿態行紅地氈。唔少頒獎嘉賓都提前同大家見面，其中甚少喺香港露面、75歲嘅元華就夥拍伍允龍出場，預告會為最佳動作指導擔任頒獎嘉賓。

現年75歲、七小福之一嘅元華參演過無數電影同電視劇，2005年憑《功夫》中「包租公」一角奪得金像獎最佳男配角，近年半退休狀態長駐加拿大，享受湊孫為樂。今次為金像獎特別返港，同後輩伍允龍一齊做頒獎嘉賓。

另外，五人樂隊組合「朱凌凌」，成員包括凌智豪（白只）、楊偉倫（阿卵）、陳文進（阿Chris）、朱栢謙（朱謙）及朱栢康（朱康），佢哋既係樂隊組合亦係表演團體。近年幾位成員積極喺影壇發展，其中朱栢謙舊年更憑《破·地獄》贏得最佳男配角。