俞可程搵男友唔要年上叔叔 心靈交流之外：我都要肉體交流！.全新節目《魔音女團》昨日（4月18日）舉行記者會，15位參賽女藝人全數亮相。當中鄧凱文同俞可程接受訪問時，唔單止大方分享拍攝期間嘅辛酸同趣事，仲互相爆料，大談感情生活同破格嘅擇偶條件，全程笑料百出！

鄧凱文話：「啲人覺得我參加完之後，個氣場唔同咗，好似sharp咗同有自信咗，不過拍攝期間一度試過低谷。因為我試過一日跳12個鐘，6個鐘同人一齊練，另外6個鐘自己練。」俞可程就話：「我最大分別就係頭髮紅咗，同埋我覺得自己『韓』咗。」記者笑言：「紅咗？」鄧凱文笑話：「我覺得你染完頭髮之後，又有《魔音》又《女神》，又有《東張》，而家咩都俾人攞晒。（三個都係最多人睇嘅節目）係呀，好妒忌。」俞可程回答：「都係公司畀機會啫，多謝公司！」

講到俞可程參加《女神配對計劃2》，佢透露對上一段戀情已經係年幾之前嘅事，但只係維持咗好短時間，最近嘅感情生活都頗為枯燥。問到擇偶目標，鄧凱文再爆料：「你上一個係咪醫生？」即係要有返咁上下？俞可程回答：「唔係一定要專業人士。（最好係？）咁一定係考慮因素，但唔代表其他職業就唔得。我嘅理想型係劉青雲。（劉青雲嘅年紀定外表？）我覺得係佢對另一半嘅態度。」

即係俞可程唔介意另一半年紀大？佢咁樣回答：「我希望都大過我，細過我就三年內。」如果年長廿年但有劉青雲嘅外表呢？佢又話：「都可以，哈哈。（年紀唔係問題？）唔係問題。（如果30年？）劉青雲就OK囉，哈哈哈。（梁朝偉呢？）都OK，哈哈哈。」即係年紀可能唔係重點，重點只係外表。佢續指，年齡太大嘅話，之後日子相處都會有其他問題：「嗰陣時步伐可能會唔一樣。」

上一季都有唔少年紀較大嘅勇者出現，俞可程又點睇？佢回答：「但係我嘅目標唔係純粹照顧一個人，而係要有心靈交流。」記者話，年紀大都有心靈交流。鄧凱文話：「嗰啲最多心靈交流！淨係心靈交流！」記者笑言：「嗰啲冇肉體交流⋯⋯淨係得心靈。」俞可程回答：「哈哈，我都要肉體交流，哈哈哈哈哈！都好重要！每一樣嘢都要。」鄧凱文就話：「嗱，呢樣嘢唔關我事。」

TVB