李海銅专访：立志做療癒系演員 內向女孩追夢.有「藝訓班班花」之稱嘅李海銅，早前憑劇集《臥底嬌娃》中同馬貫東嘅「風盈CP」成功入屋，角色「蘇嘉盈」成為佢嘅代表作。李海銅話冇諗過迴響咁大，好多謝觀眾嘅愛錫同正面鼓勵。

佢分享自己嘅演藝初心，係想成為一個能夠療癒到大家嘅演員。「細個經歷父母離異，有一排好唔習慣，後嚟明白家人依然用佢哋嘅方式愛我，自己好快走出來。希望都可以令觀眾感受到被愛嘅感覺。」劇集播出期間正值考試季節，有妹妹仔寫信畀佢，話「嘉盈」幫佢紓解考試壓力，令李海銅好感動。

雖然獲封「最佳女友」，但李海銅自認係「最強閨蜜」，性格比較男仔頭，同角色有反差。「我係獨女，公公婆婆湊大，好早就識照顧自己，唔想家人擔心。」佢透露現時單身，期望將來搵到一個雙向奔赴嘅另一半。

入行前，李海銅係對住數字返工嘅普通人，因為試過KOL拍攝覺得好玩，於是決定辭職追夢。「當時份工要三個月通知期，我貼錢走，想30歲前挑戰自己。拍過劇之後，我知道呢份工會成為我嘅終身職業。」

自認內向嘅李海銅，話考訓練班已經係用盡勇氣。「我以為演員只係喺錄影廠拍戲，點知要面對好多人，仲學習緊。」佢最難忘嘅演出係《刑偵12》入面飾演有斯德哥爾摩症嘅角色，寫咗人物小傳，半日實景喊戲令佢非常投入。

入行後，李海銅得到兩位花旦支持——兒時偶像鍾嘉欣，以及前輩高海寧。高Ling喺《夫妻的博弈》合作後一直愛護佢，去年台慶環節仲特登揀佢一齊演出。李海銅獲77工作室重用，參與過《新聞女王》、《刑偵12》、《飛常日誌II》等大製作。佢話將來想試做奸角、big boss，因為大家都覺得佢冇攻擊力，反而想挑戰反差。TVBTVB